മിർസ ഖിസർ സുൽത്താൻ

അവസാന മുഗൾ ചക്രവർത്തിയായിരുന്ന ബഹാദൂർ ഷാ സഫറിന്റെ ഒമ്പതാമത്തെ പുത്രനായിരുന്നു മിർസ ഖിസർ സുൽത്താൻ (ജീവിതകാലം: 1834 - 1857). സഫറിന് ഒരു വെപ്പാട്ടിയിലുണ്ടായ പുത്രനായിരുന്നു ഇദ്ദേഹം. ഒരു കവി എന്ന പേരിലും ഉന്നമുള്ള വെടിവപ്പുകാരൻ എന്ന പേരിലും തന്റെ സൗന്ദര്യത്തിന്റെ പേരിലും അറിയപ്പെട്ടിരുന്നു. 1857-ലെ ലഹളക്കാലത്ത് വിമതശിപായിമാരോടൊപ്പം ചേർന്നിരുന്നെങ്കിലും ബാദ്ലി കി സെറായിലെ പോരാട്ടത്തിൽ പേടിച്ചോടുകയും വിമതസൈന്യത്തിനിടയിൽ പരിഭ്രാന്തി പടർത്താൻ കാരണമാകുകയും ചെയ്തു. യുദ്ധകാലത്തെ അഴിമതിയുടെ പേരിലും നഗരത്തിലെ പണമിടപാടുകാരെ തടവിലാക്കി അനധികൃതമായി പണം പിരിച്ചതിന്റെ പേരിലും കുപ്രസിദ്ധനാണ്.